Nga të gjitha karakteristikat e produkteve të Apple-it, kuptohet se ikona e një ore do të jetë gjëja e fundit që mund të shkaktojë polemika. Megjithatë, shumë shpejt pasi Apple hodhi në treg një orë të re për iPad-in si pjesë e përditësimit të iOS 6 nga mesi i shtatorit, kompania u akuzua për kopjim të dizajnit nga Hekurudha Federale Zvicerane.
Ora zvicerane në fjalë është projektuar që në 1940 nga Hans Hilfiker dhe konsiderohet një simbol i kompanisë dhe vetë vendit. Hekurudha Zvicerane kërcënoi se do të ngrinte padi, por brenda disa javësh, Apple u duk se e hëngri presionin dhe ra dakord të licenconte dizajnin e orës.
Por gjatë kësaj kohe, publikimi nga gazeta zvicerane Tages-Anzeiger raporton që Apple ka paguar $21 milionë për të drejtat e licencimit.