Përveç shkurtimit të 18,000 vendeve të punës dhe eliminimit të linjës së telefonave Nokia që bazohen në sistemin operativ të Google, Android, Microsoft gjithashtu është duke e marrë një vendim tjetër shumë të rëndësishëm: ndërprerjen e prodhimit të telefonave të thjeshtë nën markën e njohur Nokia, të cilën tashmë e ka në pronësinë e saj.
Kjo informatë është dhënë nga një ekzekutiv i kompanisë Microsoft për The Verge, dhe e njëjta pritet të zyrtarizohet shumë shpejtë me një vendim i cili do të dërgojë në zbatimin e plotë të këtij vendimi.
Në fakt, në memon e siguruar nga The Verge thuhet se seria e telefonave Nokia Series 40 dhe linja e telefonave të lirë, Nokia Asha nuk do të jenë më, dhe kjo shuarje do të bëhet brenda një periudhe prej 18 muajsh.
Vendimi për shuarjen e telefonave të thjeshtë nënkupton që Microsoft do të krijojë më shumë hapësirë për sistemin e saj operativ, Windows Phone, me modele të telefonave që kushtojnë rreth 50 dollarë, por pa i lënë anash edhe modelet e avancuar të telefonave, të cilët paralajmërohet se Microsoft do ti lansojë së shpejti.